'Affinering'

Teks:  Maleagi 3:2-4, Psalm 66:10-12
 
Wanneer goud uit die aarde ontgin word, lyk dit nie soos goud wat ons in die juwelierswinkel vind nie. Dit is baie keer onherkenbaar vanweë die onsuiwerhede wat die ware prag verdoesel.

Die 'affinering' van metale, soos silwer en goud, is ‘n warm proses. Hitte word toegepas om die onsuiwerhede na die oppervlak te dryf. Soos die vuilheid na bo kom word dit verwyder. Die proses word herhaal tot die goud of silwer suiwer is. Die goudsmit weet die goud is suiwer wanneer hy sy eie refleksie daarin kan sien.
 
God se Woord sê dat Hy ‘n soortgelyke proses gebruik in ons lewens. Elkeen van ons sal eerste wees om te erken dat ons nie perfek is nie en gevul is met onsuiwerhede. So is ons lewens ook gevul met uitdagings, gebeure en besluite wat ons ongemaklik laat. God gebruik die hitte van ons lewensomstandighede as proses om ons lewens te suiwer. Dit is nie ‘n eenmalige gebeurtenis nie, maar ‘n herhalende proses tot God se beeld in ons duidelik word.
 
Geseënde week verder en sien jou Sondag by ons Erediens.

Andre
 

Vorige Briewe