Die kleur van sonde

Teks: Spreuke 29:1-23; Johannes 17:1-
 
Wat is jou grootste vrees in die lewe? Die afwesigheid van gehoor, mobiliteit, of sig is vreesaanjaend. Miskien is jou vrees die sinloosheid wat gepaard gaan met ‘n leë of skynbaar doellose lewe. Wat ookal jou vrees is, meeste mense is eens dat die negatiwiteit, bekommernis en onsekerheid wat vrees vergesel ‘n gevaar is.
 
As gelowiges is sonde ons groot gevaar. Dit het die vermoë om ons lewens te vul met onsekerheid en vrees wat ons lewensgroei en -reis tot stilstand kan bring. Sonde maak ons lewe sinloos. Sonde maak ons lewens-wêreld kleurloos, want dit wil God se kleur vir ons lewe verberg.
 
Wanneer God ‘n mens se lewe betree, vul dit met kleur en sinvolheid. Wanneer ons God raaksien, instede daarvan om in die sonde vas te kyk, sien ons Sy genade en liefde. Dit vul ons lewe met helderheid wat God se verlossing in Jesus Christus verstaan. Deur Hom word ons lewens opgekikker en ingekleur om die ongelooflike reis te wees wat Hy dit bedoel het om te wees.
 
Gebed:

Hemelse Vader, help my om verby my sonde en foute te kyk, om U goedheid en liefde vir my raak te sien. Wanneer dit moeilik is, O Heilige Gees, help ons om mekaar by te staan. Dankie vir die kleur van U liefde, wat duidelikste skyn in my nietigheid. Amen.
 
Andre






 
Vorige Briewe