In pas in die legkaart van die lewe

Die raam van die legkaart is die eerste wat gebou word
En 'n visioen word langsaam op my tafelblad ontvou
En as ek gaan volgens die dinge wat die houer deksel sê
Gaan daar binnekort 'n meesterstuk hier op my tafel lê

Die voorbeeld op die deksel is al klaar 'n grootse werk
Die kleure lyk verruklik en die komposisie sterk
In die prent sien ek drie konings wat opgewonde wys
In die rigting van 'n ster wat bo die horison verrys

In die middel van die prent, is 'n palet van pastelkleure
Daar's planete en sterre van te kies en van te keur
Maar die een wat ek wil hê is die een waarna die konings kyk
Die ene wat kompleet net soos die ster van Bethlehem lyk

En eindelik is die legkaart dan so byna byna klaar
En maklik pas die stukkies wat nog oorbly inmekaar
Maar net een stuk is nie daar nie en dit wroeg hier in my gees
Net daardie een is weg waarop die Bethlehem ster moes wees.

Stuk vir stuk so bou ek aan die legkaart van my lewe
Met elke stuk wat pas word nog 'n leemte ingevul
Stuk vir stuk so bou ek aan die legkaart van my lewe
Met elke nuwe stuk word nog 'n lewensdroom vervul

                                                    Lukas Maree

Mag jy opnuut vind hoe hierdie stuk in jou lewens-legkaart pas..

Seënwense
Andrè


 
Vorige Briewe