KersWonder

Teks: Lukas 2:1-7

Die wonder van die komende Kersfees glinster regdeur die wêreld. Sitkamers, huise, strate en stede word opgemaak met kleure en liggies. Soms voel dit of al hierdie wonderlike tekens meer geword het as die werklike Wonder waarna ons uitsien.
 
Ds HT van der Linde skryf die volgende: Keiser Augustus het ‘n bevel uitgevaardig dat ‘n volkstelling in die hele ryk gehou moes word. Dit was deel van sy plan om een wêreldryk te skep, tot vergoding van die keiser. Daar was dus twee ryke werksaam: dié van die keiser en dié van God. Die Romeinse ryk van Augustus het uiteindelik ineengestort in bloed en rook en puin. Na hom was daar nog baie regeerders en agendas. Hulle het verrys, net om vir ewig vernietig te word. Maar die ryk van die Kindjie, Jesus Christus sal bestaan tot in ewigheid. Steeds vergader die Here se kerk, week na week, jaar in en jaar uit.
 
Die geskiedenis is in God se Hand. Die Wonder van Kersfees is in God se Hand. Deur alles wat ons sien en hoor, regeer God. Niks kan ons Koning se ryk laat glip nie. Kersfees bevestig dat die ryk van Jesus Christus die Here gekom het, selfs vandag 20 eeue later, en tot in ewigheid.
 
Geseënde Advent.
Andre

Vorige Briewe