Trapsoetjies perspektief

Teks: Efesiërs 4:31-32

31 Moet nooit verbitter of opvlieënd wees of woedend word nie; moenie vloek of skel nie; moet niks doen wat sleg is nie. 32 Wees goedgesind en hartlik teenoor mekaar, en vergewe mekaar soos God julle ook in Christus vergewe het.
 
‘n “Chameleon” is meer bekend as ‘n 'trapsoetjie' of ‘n 'verkleurmannetjie',  eenvoudig vanweë die feit dat hulle so stadig en saggies loop en die vermoë het om teen byna enige agtergrond hulself te kan kamoefleer. Een van hulle fassinerende eienskappe is dat hul oë op dieselfde tyd in verskillende rigtings kan kyk en sien.
 
As mense poog ons soms ook om in te pas by ons omgewing, maar ons gesigsveld is beperk en so ook ons perspektief. ‘n Nou perspektief kan ons meer gefokus maak, maar vergroot ook die kans vir misverstande omdat ons nie alles kan sien nie. Daarom is dit belangrik om nie aannames te maak oor ander mense, hulle omstandighede en besluite nie.
 
God sien gelukkig alles. Daarom roep Hy ons op om nie veroordelend te wees nie, maar om te verstaan, omdat Christus ons verstaan. Waar ons opnuut die wêreld inbeweeg, mag ons 'soetjies' trap met ons perspektief, woorde en dade.

(met gedeeltelike erkenning aan Heather Tietz)

Seënwense,
Andre

Vorige Briewe