Hoop in verwondering

Teks: Jesaja 11:1-10
 
Rev. Lim Kim Hock skryf dat baie mense vandag vra: "Hoe kan ons Kersfees in so 'n tyd soos hierdie vier? Daar is oral probleme: oorloë, siekte, honger, diskriminasie, vooroordele, onreg, ens. Waar is God? Is Hy goed? Hoekom kan Hy nie ontslae raak van al die probleme nie? Hoekom is kanker en vigs so algemeen? Mense sterf oral. Wag Hy vir almal om te sterf voordat Hy iets doen?”
 
Terwyl ons al hierdie vrae vra, weet ons eintlik diep in ons harte, dat God omgee. Hy het nie 'n gebrek aan krag of vermoë nie, maar tog is daar redes bo ons begrip, oor hoekom al hierdie probleme steeds bestaan en hoekom daar nog soveel swaar en seer is. Kersfees, en die betekenis daarvan is God se antwoord op al daardie knaende twyfel en gedagtes wat ons teister.
 
In Kersfees bring God vir ons 'n boodskap van Hoop. God sal al die uitdagings en probleme oplos, maar op Sy eie tyd en manier. God se weg bestaan uit 'n belofte –

1. 'n Takkie sal uitspruit uit die stomp van Isai, 'n loot uit sy wortels sal vrugte dra.
2. Die Gees van die Here sal op hom rus:

die Gees wat wysheid en insig gee,
die Gees wat raad en sterkte gee,
die Gees wat kennis verleen en eerbied vir die Here.

3. Die takkie sal vreugde vind in die diens van die Here.

   (Jesaja 11:1-3)

Kersfees is 'n tyd wat ons, onsself herinner aan die hoop wat ons in Christus Jesus het. Kersfees is ons hoop en verwondering dat iets goeds kan kom, uit omstandighede wat so hopeloos lyk.
 
Geseënde Advent
Andrè