Klip en Vleis

Teks: Handelinge 17:24

 Berge is klipformasies wat tot in die hemelruim troon, en terselfdertyd getuig van ‘n selfs groter voet-anker wat onsigbaar is vir die menslik oog. Klippe is die fondament van hierdie aarde.

Mense beskryf klippe met woorde soos koud, swaar, oud, hard, solied, ondeurdringbaar, leweloos, gevoelloos en dood, alhoewel ons elkeen dadelik sal erken dat klippe en stene baie nuttig is en kan wees. Die kastele van ouds was gebou uit klip vanweë die genoemde eienskappe; geboue en huise vandag word steeds gebou met stene vir dieselfde rede(s).
 
Soms dink mense God lewe in klip geboue. Die Israeliete het geglo dat God in die ark in die tempel woon, tog sê Handelinge 17:24 – “God, wat die wêreld met alles wat daarin is, gemaak het, Hý is die Here van hemel en aarde, en Hy woon nie in tempels wat deur mense gemaak is nie.”. In die tyd van Esegiël word die tempel vernietig en gebruik God die geleentheid om deur die profeet Esegiël die mense te herinner dat Hy in die vlees leef.
 
In Johannes lees ons dat God self vlees geword het deur Sy Seun Jesus Christus. Hy het ook Sy Gees aan Sy kinders gegee om hulle in hul vleeslike bestaan by te staan. Hy is werklik Immanuel – God met ons.
 
Geseënde week en sien uit om jou by die erediens te ontmoet om God te loof: 
André

 

Vorige Briewe