In stryd met God.

Teks: Job 19:21-29
 
Om al jou besittings, al jou kinders en jou gesondheid te verloor, is seker van die ergste dinge wat met enige mens kan gebeur. As jy nog daarby, soos Job, voel dat jy nie iets gedoen het om dit te verdien nie, is dit soveel erger. Om dan steeds jou geloof in God te hou, soos Job, is iets wat ons moeilik kan voorstel.

Maar dit is geloof. Die 11de eeuse Hebreeuse digter, Salomo ben Gabirol bely dit so:
Daarom, al slaan U my, sal ek U vertrou. Want as U my onreinheid moes nagaan, sal ek van U na Uself moet vlug. Ek sal skuil van U toorn in U skaduwee. Aan die rante van U genade sal ek hang totdat U my genadig is.
 
Mag jy deur die genade van God, in staat wees om aan die rante van Sy genade te bly vashou. Al loop alles dan verkeerd, sal jy steeds Sy genade ervaar.

(erkenning aan Annes Nel)

 
Gebed: Here, soms sukkel ek om U genade raak te sien. Bind my aan U rante deur U genade, in die redding van U Seun. Gees van God, hou my naby aan U, veral in my swakste oomblikke. Amen.
 
Geseënde en genadige week.
Andrè

Vorige Briewe