Geringe sake

Ons moenie die waarde van die ‘geringe’ in die lewe onderskat nie.
 
In Matteus 25 leer Jesus oor Sy koninkryk. Hy maak dit duidelik dat ons ‘n verantwoordelikheid het teenoor die koninkryk van God: Neem dit as erfenis in besit, want Ek was honger, en julle het My iets gegee om te eet; Ek was dors, en julle het My iets gegee om te drink; Ek was 'n vreemdeling, en julle het My gehuisves; Ek was sonder klere, en julle het vir My klere gegee; siek, en julle het My verpleeg; in die tronk, en julle het My besoek.’.  Die vraag kom dan: Maar wanneer het ons dit aan U gedoen? en Jesus antwoord dan: Dit verseker Ek julle: Vir sover julle dit aan een van die geringste van hierdie broers van My gedoen het, het julle dit aan My gedoen.’
 
Die voorkoms van ‘geringes’ is soms moeilik om te herken. Die saak en verstaan van ‘geringheid’ is soms kompleks en moeilik. Ons optrede en lewens raak mense voortdurend aan, want ons kom elke dag in aanraking met hulle. God se liefde en genade is ‘n geskenk van ons Vader en is deel van ons lewens. Wanneer ons dus God se wil leef, raak ons mense aan met Sy genade en liefde.
 
Moenie oordeel nie, want God is lief vir die geringes, watter ‘vorm’ hulle ookal aanneem. Gaan leef intentioneel in Sy naam. Gaan maak tyd vir die klein dingetjies.  Gaan kyk vir die geringstes en gemarginaliseerdes. Gaan luister vir God se roepstem.  Sy erfenis is vir jou – gaan leef sy liefde.
 
Seënwense,
Andrè