Gebed + dankbaarheid = Wysheid 

Teks: Kolossense 4:2-6
 
Goeiemiddag Ena,
 
Die Evangelie se berekenings werk baie keer “anders” as wat die wêreld ons leer. Hoe kan vyf brode en twee vissies vyf duisend mense voed?  Hoe kan die grootste wet wees om “lief te hê”?  Hoe kan mens die lewe wen, deur jou lewe prys te gee? 
 
Paulus sluit hierby aan in Kolossense 4 -
 
2 Volhard in die gebed! Wees daarby waaksaam en dankbaar 
3 en bid tegelykertyd ook vir ons. Bid dat God vir ons 'n deur vir die woord oopmaak sodat ons die geheimenis van Christus kan verkondig waarvoor ek hier gevange sit. 
4 Bid dat ek dit duidelik sal verkondig soos dit my opgelê is.
5 Tree met wysheid op teenoor die mense wat nog buite die gemeente is. Maak die beste gebruik van elke geleentheid. 
6 Wat julle sê, moet altyd vriendelik wees en van goeie smaak getuig; en julle moet weet hoe julle elkeen behoort te antwoord.
 
As Liggaam en Gemeente van Christus bestaan ons nie vir onsself nie. God se Woord en verlossing is vir elkeen bedoel wat nog verlore is. Ons lewens – woord en daad – moet getuig van die wysheid van God. Die krag om dit te bereik, is nie in onsself te vinde nie, maar in mekaar se gebede en ondersteuning tot voordeel van ander en tot eer van God.
 
Gebed: Here, vul ons harte en lewens met opregte dankbaarheid. Help ons om te volhard in gebed, te getuig van U verlossing, en te leef met U wysheid.  Amen.
 
Geseënde week.
Andrè



Vorige Briewe