Ons behoefte aan 'konneksie' met ons kinders.

God wys nie kinders aan instansies, groepe of skole toe nie. God vertrou kinders aan ouers toe.
                                                                                                  - Yvette Otto

Wanneer jy iets aan iemand toevertrou, beteken dit dat jy daardie item met vertroue aan die sorg van ‘n spesifieke en gekose persoon opdra. Wanneer God Sy kinders aan ouers toevertrou, dra Hy hulle aan ouers se sorg op as rentmeesters vir Hom. Ons kinders is God se kinders. Dit is ons primêre taak om hierdie waarheid aan ons kinders oor te dra met woorde en dade.
 
Kinders se verwagting en behoeftes verskil radikaal van volwassenes. Navorsing het getoon dat die belangrikste behoeftes van kinders is, liefde, geduld, vertroue, aanmoediging, sekuriteit, lag, grense, erkenning, opvoeding en ‘n veilige tuiste. Ons kinders het ‘n anker en rigtingwyser nodig om hul van vroeg af op-koers te plaas. Spreuke 22:6 sê “Gee leiding aan 'n jongmens oor hoe hy moet leef,  en hy sal ook as hy al oud is nie daarvan afwyk nie.”

Martin Luther het hiervan getuig toe hy ’n aanslag op sy geloof beleef het – hy het ‘n passer geneem en oor sy tafel uitgekrap: “Ek is gedoop!” God is verbind aan ons en ons kinders van ons eerste oomblik af.
 
Kyk na jou kind deur God se oë en sien Hom in hulle. Leer en wys jou kind die waarde en waarheid van God se liefde, geduld, vertroue, aanmoediging, sekuriteit, vreugde, grense, erkenning, opvoeding en ‘n veilige tuiste.
 
Seënwense,
Andre

Vorige Briewe