Tyd vir bou en leef

  
Teks: Filippense 4:10-20

Teks: Psalm 19

Ons “omdat” geloof is ‘n lewende verhouding met God. Dit is ‘n vaste wete van God se groot dade vir ons en Sy beloftes aan ons; ‘n onwrikbare vertroue dat die Here getrou sal wees aan SY Woord(e). Daarom is ons geloof die fondament van ons lewenshuis. Hoe sterker en stewiger die fondament, hoe sterker en stewiger staan ons lewenshuis in die aangesig van die storms van die sondige lewe.
 
Die 'klippe' (fondament ) van ons geloof is kennis van die Skrif. Die klippe word deur die Heilige Gees gebind in vertroue tot ‘n vaste eenheid.

Ons moet voortdurend bid vir die werk van die Heilige Gees. Maar vir die kennis van die Skrif moet ons opoffer en werk: met Huisgodsdiens, Huiskerk, Erediens, Kategese en Bybelstudie. Want as ons God wil ken as fondament, moet ons Hom ken deur Sy Woord en gevolglik ook in ons lewens.
 
Die Kerk van alle eeue is hierop gebou. Die dissipels het gelewe van die Torah en Jesus se Woorde. Vroeë gelowiges het hierop gebou asook op die woorde van Paulus en die Evangelies. Die Kategismus en al die belydenisskrifte is op die fondamentklip(pe) van God se Woord en ‘n lewende verhouding met ons Here gebou.  Dit alles help my en jou om die geloofsfondament van ons lewenshuis vas en waterpas te lê, sodat die Heilige Gees ons huis kan saambind en vul met die nodige vrug wat Hy aan ons skenk.

                                   (gedeeltelike erkenning Dr JH Breytenbach)
 
Geseënde week.
Andrè

Vorige Briewe