Verwondering in vrees

Teks: Matteus 1:19-20
 
Die vertelling van Jesus Christus se geboorte het mense deur die eeue aangegryp. Die betekenis en impak word oraloor erken. Tog het dit nie so versekerd begin nie.
 
Aan die begin van die verhaal is daar die moontlikheid van seerkry, verwarring, teleurstelling en skande. Josef en Maria leef in daardie plek tussen geloof en vrees, hoop en misverstand. Tog was God te midde daarvan aan die werk. Beide Josef en Maria het die wonder van God se boodskap gehoor en aanvaar, ten spyte van die ooglopende en verstaanbare isolasie wat hulle moes ervaar het.
 
Ons voel soms ook geïsoleerd en vol vrees vir die onbekende. Soms is ons vrese eg, soms misplaas, maar vrees en onsekerheid is deel van die menslike toestand. Tog sê die Bybel vir ons dat volmaakte liefde vrees verdryf en sekerheid vestig. Die liefde van God kan ons lewens vul met verwondering. Soms moet ons te midde van ons stryd net luister, aanvaar, vasbyt en glo dat God dit sal laat uitwerk.
 
Gebed:
Here, ons bid vandag vir almal wat gevangenes is van vrees, onsekerheid en isolasie. Here, kom nader en bring U liefde. God, ons bid vir diegene wat in lande woon waar hul situasie enige oomblik kan vererger- diegene met geen beheer oor wat met hulle gebeur nie. Maak U teenwoordigheid bekend en vul elkeen met die verwondering van U verlossing. In Jesus se naam, Amen.
 

Geseënde Advent
Andrè