Geroep om te dien.

Teks: Johannes 13:1-17
Daarna het Hy water in 'n wasskottel gegooi en begin om sy dissipels se voete te was en dit dan af te droog met die handdoek wat Hy omgehad het.
 
God wil hê dat elke Christen Sy goeie werk in die wêreld moet doen en leef. Die Nuwe Testamentiese skrywers gebruik verskeie beelde om hierdie boodskap te illustreer. In “besigheids-terme” beskryf Paulus homself as ‘n slaaf, bestuurder of rentmeester vir Christus wat eerlik en betroubaar in alles moet wees. In “Koninkryk-terme” verwys Paulus na homself as ‘n bouer wat die fondasie van geloof in Christus se Naam lê; of boer wat die saad van God se Woord plant; en die soldaat wat die bose beveg deur die Waarheid van God se Koninkryk te bevorder. Die beste beeld is die van ‘n “Dissipel” – iemand wat in Sy meester se voetspore volg, gewillig om te luister, te leer en te doen.
 
As volgelinge en dissipels van Jesus Christus word ons deur God geroep en gedring deur Sy verlossende liefde. Ons is verbind aan Hom deur ons geloof. Daarom is ons, as gelowige kinders, in Sy diens. Ons is Sy hande en voete wat besorgd is oor ander; Sy stem wat rigting gee aan verlorenes; Sy Liefde wat hoop bring in siekte en seer; Sy Lig wat skyn vir die wat nie kan sien nie. Daar is so baie wat ons in diens van God kan doen. Daarom moet ons bid vir leiding, om te weet wat Hy wil hê ons moet doen.
 
Gebed:
Neem my lewe Heer, laat dit U gewys wees, meer en meer. Amen.

Geseënde week,
Andrè