Waaruit bestaan geloof?

Waaruit bestaan geloof? As mense wil ons meer geloof hê, sodat ons die goeie stryd kan stry, en die wedloop kan voltooi. Ons wil in die lig wandel te midde van ons omstandighede. Oswald Chambers skryf: "Die wortel van geloof is die kennis van ’n Persoon."
 
Ons groei in geloof deur ’n Persoon te leer ken; daardie Persoon is Jesus Christus, die Seun  van die lewende God. Om geloof te ontwikkel, is nie iets wat onmiddellik gebeur nie. Dit gebeur oor ‘n tydperk of leeftyd, deur te luister en te handel na die wil van ons Here.
 
Jakobus 2 verduidelik dat Abraham ’n man was, wat geloof gehad het. "Die Skrif is vervul  wat sê: En Abraham het God geglo, en  dit is hom tot geregtigheid gereken, en hy is 'n    vriend van God genoem”. Dawid was 'n man na God se hart. Alles omdat hulle God geken het; tot Hom gebid het; Hom vertrou het.
 
Hoe sien my en jou kennis en verhouding met Jesus Christus daarna uit? Wat sê God vandag vir jou, en wat hou jou terug? As jy God ken, sal jy Hom vertrou. Dit is so eenvoudig en so gekompliseerd soos dit. Jy kan nie iemand vertrou wat jy nie ken nie — die vraag is hoe goed ken jy Hom?
 
My Vader, ek  wil U beter leer ken; dit is die gebed en die begeerte van my hart. Ek wil U ken soos Abraham U geken het, en ek  wil U ook met my hele hart volg en vertrou.
Amen.
(Gedeeltelike erkenning  Angus Buchan)
 Andrè

Vorige Briewe