Piekniek in die park.....van geloof.

Teks: 1 Korintiërs 3:5-9

In die park en rondom ons – binne die huis en buite in die tuin – is plante besig om te blom en groei. Hier en daar bespeur ons tekens wat die aanloop tot die einde van die somer wil aankondig, wat ons gedagtes neem na die volgende seisoen van tuinmaak. Daar is soveel dinge om oor te dink, dat ons dit baie keer oorweldigend vind.
 
In 1 Korintiërs 3:5-9 gebruik Paulus die plant-siklus om te getuig van sy geloof. “Ek het geplant, Apollos het natgegooi, maar dit is God wat laat groei het (vers 6)”.  Net soos dit geld vir sade, plante en tuine, geld dit ook vir ons geloof, sowel as die geloof van ons kinders en die mense rondom ons. Ons kan plant en natmaak, maar God voorsien die groei.
 
Waar jy jou ookal vandag bevind en hoe jou lewens-tuin ookal daarna uitsien – weet en onthou – God voorsien die saad van geloof wat ons moet plant, en God voorsien die groei. Ons plant miskien 'n saadjie van geloof wat iemand anders sal natmaak terwyl hy langs die kinders of persoon loop wat ons ken. Ons vertrou op God om die geloof in ons kinders en ander te laat groei, net soos ons op God vertrou om ons saad in plante te laat groei.
 
Geseënde week en sien jou Sondag by Huiskerk.
Andrè

Gebed: Here God, dankie vir die saad van geloof. Wil U dit laat groei binne my, my kinders en ook in ander. Lei my om U wil te doen. Amen. 


 

Vorige Briewe