Geloof in onsekere tye.

Die afgelope 18 maande was op verskeie vlakke en maniere, ‘n enorme uitdaging. Die afgelope paar weke in Suid Afrika was intens vanweë COVID en die onrus. Dit en al die ander sake van die lewe, laat ons met intense geloofs- en lewensvrae.

Josh Hughes maak die opmerking: 'Vir gelowiges is vertroue die aspek van ons geloof wat gereeld getoets word. Vir my sukkel ek selde om te glo dat die evangelie waar is, maar soms wonder ek hoe waar die evangelie vir my is. Is God regtig 'n beloner van diegene wat hom soek? Glo ek regtig met my hele hart dat hy goed is en goed doen? Soms sukkel ek bloot omdat ek ophou glo wat ek glo.'
 
Die Hervormers het geleer dat reddende geloof uit drie elemente bestaan: kennis, instemming en vertroue.

Kennis handel oor die inhoud van ons geloof, die feite en stellings wat ons moet glo om gered te word. Ons geloof is in iets (meer spesifiek – in Iemand).

Instemming handel oor ons oortuiging rakende die kennis. Ons moet nie net die feite van die evangelie, tov redding, ken nie, maar ons moet dit glo as die Waarheid.

Vertroue is die derde element. Ons moet in afhanklikheid van hierdie Waarhede in nederige vertroue leef. Ons moet onsself volkome toevertrou aan die Boodskap wat ons hoor en glo met gehoorsaamheid.
 
Jakobus 2:19 stel dat selfs die demone kennis en instemming het, en dat dit hul laat sidder. In Daniël 2:46 toon Nebukadnesar kennis en instemming dat God die enigste ware God is. Maar in beide hierdie kort daar iets…volkome vertroue. Vertroue in God is ‘n kritiese komponent van ons geloof, veral in moeilike, swaar en onsekere tye.
 
Geseënde week.
 
Geseënde week. Sien jou by Sondag se Huiskerk.
Andrè

Vorige Briewe