Konstante in verandering.

Teks: 1 Kronieke 28:1-10
 
In ons gemeente se Bybelleesprogram vandag kondig Dawid aan dat Salomo hom sal opvolg as koning oor Israel. Salomo sal ook die tempel bou tot eer van God en nie Dawid homself, soos hy beplan het, nie. Dit is duidelik deur Dawid se woorde dat hy bewus is dat verandering meestal moeilik, onverwags en konstant is.
 
Ons wêreld het dit hierdie jaar ook geleer. Verandering het onverwags oornag ingetree en die aanpassing van ons lewens is uitdagend. Meeste van ons se verwagting is dat die verandering voortdurend gaan wees in die maande en selfs jare wat kom. En soos met Dawid en deur die verhaal van die geskiedenis, blyk dit dat verandering die konstante van die lewe is.
 
In vers 9-11 gee Dawid aan Salomo raad om voor te berei en gereed te wees vir hierdie uitdaging. Soek God en ken Hom as jou Vader, want soos met alle ander dinge hou Hy dit in Sy hand. Selfs verandering is in Sy hand. Vertrou God en Hy sal jou lei deur die omwentelinge en onsekerhede van verandering en Hy sal jou versterk op die nodige tye. Hierdie woorde is vandag net so waar vir jou, soos dit was vir Salomo.
 
Mag jy vind dat God jou konstante is.

Sien jou Sondag in jou huis by Huiskerk!
Andrè

Vorige Briewe