Sien God in die dinge van elke dag.

Teks: Genesis 28:10-16
 
In Jakob se droom is daar engele wat met ‘n leer op- en afklim. Dit is simbolies van die kontak tussen hemel en aarde. In die droom word hy verseker dat die Here hom, ten spyte van sy bedrog, nie in die steek sal laat nie. God sal al Sy beloftes nakom en waar maak. So word Jakob se oornag plek, ‘n plek van ontmoeting tussen Jakob, die bedrieër, en God, ons getroue Vader.

Ons hoef God nie ver te gaan soek nie. Hy wys Sy hart vir jou op die vreemdste, tog spesiaalste plekke, soms waar ons dit die minste verwag. God openbaar Hom aan Moses in ‘n brandende bos; aan Josef in slawerny; aan Jona in die vis en aan Maria deur die engel se boodskap. Daarom vind ons Hom in ‘n krip en aan ‘n kruis. Jy sal Hom tydens jou krisisse en hartseer vind. Jesus is Immanuel. Hy het Sy Gees gegee om jou te vul. Hy leef in jou.

Maak jou oë oop vir God se teenwoordigheid. Kyk en soek na Hom in jou uitdagings. Sien Hom ook in jou alledaagse gebeure. Hy is daar by jou, al besef jy dit nie.
 
Ons gaan vanaand van 20:00 – 21:00 bietjie kyk na die lewe van Rut. Skakel gerus in op die Zoom link op die webblad.  Hoop om jou daar te sien.
 
Seënwense, 
Andrè

Vorige Briewe