Oppad vanaf die stal.

Na die magiese besoekers uit die Ooste aan Jesus hulde gebring het is hulle terug na hulle land. God waarsku hulle in ‘n droom om ‘n ander roete te volg (Matt 2:12) en hulle gehoorsaam die God wat hulle nie geken het nie, maar leer ken het in die krip.

Dit is duidelik uit Matteus se weergawe van Jesus geboorte, dat die heidene sy ster van vêr af – uit die Ooste – herken het. Die elite van die destydse heidendom het aan Hom luukse geskenke gebring omdat hulle hom erken het as koning. Dit alles terwyl die Jode – wat die Messias verwag het – Hom nie herken of erken het nie.

Ons het nounet die Christusfees gevier. Ons is vandag oppad vanaf die stal na ‘n lewenspad waarin God se Lig skyn en ‘n werklikheid is. God verskyn dalk nie in ‘n droom vanaand of more aand aan jou nie, maar Hy rig jou. inteendeel Hy het sy Seun, Gees en Woord vir jou gelaat en gee dit vry;ik aan jou om jou lewe te rig.

Waarheen gaan jy? Gaan jy terug na die land van ongeloof en blindheid; of volg jy sy stem, woord en wil?

Gebed:  Here God praat met my. Here Jesus leer my. Here Heilige Gees versterk my. Amen

Groetnis
Andrè