Om te verskil

Vanaf die Tuin van Eden regdeur die Bybel en tot vandag is konflik, verskille, geskille en ‘nie saamstem nie’ deel van die lewe. Dit is duidelik op verskeie plekke dat God nie met die mens se keuses en handeling saamstem nie. Tog dink ons nie daaraan as ‘n geleentheid of manier om ‘soos God’ op te tree nie.
 
Jo Frost, direkteur van Kommunikasie van die 'Evangelical Alliance', skryf dat konflik verhoudinge kan ontwrig en vernietig. Maar hy noem ook dat hy glo daar is vyf dinge wat ons kan oorweeg en doen om op ‘‘n goeie manier’, of ‘die regte manier’ te kan veskil.

Eerstens moet ons die ander party herken as ‘n person en skepsel geskape na die beeld van God.

Tweedens is dit belangrik om presies vas te stel waaroor mens verskil. Dit kan slegs gebeur deur te luister na die ander persoon, sowel as na God.

Derdens moet ons leer, om soos Jesus, goeie en eerlike vrae te vra wat konstruktief ten doel het om die punt(e) van verskil te belig en uit te sorter.

Vierdens moet ons nie deur trots en eer verblind word nie. Die krag en gevolg van ‘n opregte en tydige verskoning kan nie onderskat word nie.

Laastens is vrede ‘n geskenk van God. Dit is die kenmerk van Sy Koninkryk. Filippense 4:6 sê “maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus.”
 
Soos my liewe Pa altyd gesê het: "Daar is in alles ‘n regte en verkeerde manier om iets te doen." Kom ons vra God om ons te help om selfs konflik altyd op die regte manier – soos Christus – te hanteer.
 
Andre

Vorige Briewe