Lydenstyd 

 

Op die 14de Februarie het lydenstyd (‘Lent’) begin.  Dit is tyd in die kerklike jaar wanneer ons in diepte kyk na Jesus se lyding wat Hy verduur het in die weke voor sy kruisiging.
 
In drie van die vier Evangelies word melding gemaak van ’n paasmaaltyd wat Jesus saam sy dissipels genuttig het kort voor sy lyding begin het. Die dissipels se vraag aan Jesus: Waar wil U hê moet ons gaan regmaak vir U om die paasmaaltyd te eet? (Matt 26: 17b). Die woorde vir U maak dit duidelik – dit is Jesus se paasfees. Jesus se volgende opmerking versterk die boodskap: My tyd is naby... (Matt 26: 18b). Die paasfees wat Jesus saam met sy dissipels vier, is die begin van die einde van Jesus se werk op aarde. Daarna het sy lydenspad begin.
 
Die gebruik om saam met iemand te eet, het in die Bybelse tyd ’n baie sterk simboliese betekenis gehad deur op ’n besondere wyse jou verbondenheid met mense uit te druk. Hierdie ete saam met Jesus se getrouste volgelinge, dui op sy simboliese eenwording met hulle en die oordrag van die werk wat Hy op aarde begin het.
 
Vandag vier ons elkeen steeds die Paasmaaltyd saam. Ons herinner mekaar aan ons ‘een wees’ met Jesus. So onthou ons dat Hy aan elkeen van ons, soos aan die dissipels destyds, die voortsetting van sy werk hier op aarde opdra en oordra. Die woorde in Matteus vind dus gereeld sy herhaling in ons lewens: In jou huis wil Ek saam met jou die paasmaaltyd hou... (Matt 26: 18c).
            (met gedeeltelike erkenning aan Dr Gerhard Nel)